Wedi’i ddatblygu gan bobl anabl ar gyfer pobl anabl – ond beth mae’n ei olygu?

Yn llawer rhy aml, mae pobl yn gwneud penderfyniadau ar ran pobl anabl, hyd yn oed pan fydd prosiectau a chynnyrch wedi’u dylunio i’w defnyddio gennym ni! Dyna pam mae All In yn cael ei ddatblygu gyda phrofiadau bywyd, sy’n golygu y gallwn fynd i’r afael â’r rhwystrau i greadigrwydd a diwylliant mewn ffordd ddilys ac effeithiol.

Anabledd fel elfen ganolog

Mae ein tîm yn cynnwys pobl â llawer o wahanol ofynion a phrofiadau mynediad, sy’n cyfrannu cynrychiolaeth werthfawr i brosiect sy’n agos at ein calonnau. Yn ogystal â diddordeb proffesiynol mewn creadigrwydd a diwylliant, mae hefyd yn bwysig ar lefel bersonol; boed hynny’n mwynhau cynyrchiadau theatr, mynychu gigs cerddoriaeth neu ymweld ag eiddo treftadaeth. Trwy uno ein cariad at yr hyn a wnawn gyda phrofiad gwirioneddol o rwystrau, gallwn nodi cwestiynau, heriau a chyfleoedd yn gynt nag y gall person nad yw’n anabl.

Profiad ac arbenigedd

Yn ein camau dechreuol a chynllunio, treuliodd y tîm amser yn gweithio gyda phobl anabl ac ymgynghorwyr anabledd i sicrhau bod eu profiad a’u harbenigedd wedi’u hymgorffori yn All In o’r cychwyn cyntaf. Fe wnaethom hefyd sefydlu Grŵp Ymgynghorol sy’n cynnwys pobl anabl ag ystod amrywiol o ofynion mynediad ac o wahanol genhedloedd. Ymgynghorir â’r grŵp bob cam o’r ffordd, gyda’u mewnwelediadau a’u hadborth yn cael eu defnyddio i lunio cynllun mynediad wedi’i ddatblygu gan yr union bobl y mae wedi’i gynllunio i’w cefnogi.

Dewis cyflenwyr cynhwysol

Mae cyflenwr da yn gyflenwr cynhwysol, a dyma pam ei bod yn hollbwysig ymgorffori’r disgwyliadau hyn ym mhroses gaffael Cyngor Celfyddydau Lloegr. Fe wnaethom ddewis cyflenwyr yn ofalus a fyddai’n gweithio gyda’r tîm ehangach i ddatblygu a chyflawni gwahanol elfennau’r cynllun mynediad, gan gynnwys safonau hygyrchedd ac offer digidol.

Fe wnaethom ofyn hefyd i gyflenwyr ddangos sut yr oeddynt yn bwriadu cynnwys profiad bywyd yn eu gwaith. Er enghraifft, bydd Attitude is Everything, elusen anabledd sy’n ysgrifennu’r safonau hygyrchedd, yn galw am 3000+ o bobl anabl i arwain datblygiad y gwaith hwn.

Roeddem wrth ein bodd yn gweld yr ymdrechion hyn yn cael eu cydnabod ym mis Ebrill 2025, pan enillodd Cyngor Celfyddydau Lloegr ac All In Wobr Gaffael Disability Smart.

Newidiadau cadarnhaol y tu hwnt i All In

Mae’r dull cynhwysol hwn o gaffael hefyd wedi cael effeithiau ehangach y tu hwnt i All In. Mae ein cyflenwyr yn gwneud gwelliannau i’w harferion cynhwysol eu hunain trwy ei gwneud yn ofynnol iddynt ymrwymo i gyflawni ‘Gwerth Cymdeithasol’. Er enghraifft, mae Calvium, ein cyflenwr digidol, wedi ymrwymo yn eu contract i ddarparu cyfleoedd profiad ac ymgysylltu i gyfranogwyr byddar, anabl, a niwrowahanol, ac i ddod yn Gyflogwr Hyderus o ran Anabledd.

Dyfodol o gynhwysiant

Ar hyn o bryd, mae All In yn canolbwyntio ar ddiddymu rhwystrau i greadigrwydd a diwylliant, ond mae cynrychiolaeth pobl anabl yn bwysig ym mhob maes. Drwy osod safon uchelgeisiol yn ein sector, rydym yn gobeithio y bydd sectorau eraill yn edrych atom fel esiampl o’r hyn y gellir ei gyflawni pan fydd cynhwysiant a phrofiad bywyd yn cael eu hymgorffori mewn prosiect o’r cam cychwynnol.