Ga dhèanamh le daoine le ciorram do dhaoine le ciorram – ach dè tha sin a’ ciallachadh?

Ro thric, nithear co-dhùnaidhean airson daoine air a bheil ciorram dhuinn, fiù ‘s nuair a tha pròiseactan agus toraidhean air an dealbhadh gus an cleachd sinn iad! Sin as adhbhar gu bheil All In ga chruthachadh le eòlas beatha a tha a’ fàgail gun urrainn dhuinn dèiligeadh ri cnapan-starra a thaobh cruthachalachd agus cultar ann an dòigh fhìrinneach agus bhuaidheach.

Tha ciorramachd aig a chridhe

Tha an sgioba againn air a dhèanamh suas de dhaoine le mòran diofar riatanasan ruigsinneachd agus eachdraidhean eadar-dhealaichte, is mar sin tha riochdachadh luachmhor aig a’ pròiseact seo a tha glè chudromach dhuinn. A bharrachd air ùidh phroifeasanta a bhith againn ann an cruthachalachd agus cultar, tha e cudromach cuideachd aig an ìre phearsanta; bho bhith a’ frithealadh dealbhan-cluiche, a’ dol gu cuirmean ciùil, no a’ tadhal air togalaichean eachdraidheil. Le bhith a’ toirt còmhla gaol air na bhios sinn a’ dèanamh, agus fìor eòlas air cnapan-starra, is urrainn dhuinn ceistean, dùbhlain agus cothroman a chomharrachadh nas luaithe na ‘s urrainn do dhaoine gun chiorram.

Eòlas is sgilean

Anns na h-ìrean tòiseachaidh is dealbhaidh, chuir an sgioba seachad ùine ag obair le daoine le ciorraman agus comhairlichean ciorraim gus dèanamh cinnteach gun deach an cuid eòlais agus sgilean a thoirt a-steach ann an All In bhon fhìor thoiseach. Stèidhich sinn cuideachd Buidheann Comhairleachaidh de dhaoine le ciorraman agus raon farsaing de riatanasan ruigsinneachd agus à diofar dhùthchannan. Bithear a’ bruidhinn ris a’ bhuidhinn aig gach ceum den t-slighe, agus thathar a’ cleachdadh am beachdan agus am fios-air-ais gus sgeama ruigsinneachd a chur air dòigh a chaidh a chruthachadh leis na daoine dham bi e a’ toirt taic.

A’ taghadh solaraichean ion-ghabhaltach

Bidh deagh sholaraiche a’ gabhail a-steach a h-uile duine, agus sin as adhbhar gun robh e ro-chudromach na dùilean sin a thoirt a-steach do phròiseas solarachaidh Comhairle Ealain Shasainn. Thagh sinn solaraichean gu faiceallach a bhiodh ag obair leis an sgioba nas fharsainge againn gus diofar eileamaidean den sgeama ruigsinneachd a chruthachadh agus a lìbhrigeadh, a’ gabhail a-steach bun-inbhean ruigsinneachd agus innealan didseatach.

Dh’iarr sinn air solaraichean cuideachd sealltainn mar a bha iad an dùil eòlas beò a thoirt a-steach dhan obair aca. Mar eisimpleir, tha Attitude is Everything, carthannas air a stiùireadh le daoine air a bheil ciorram, a tha a’ sgrìobhadh nam bun-inbhean ruigsinneachd, a’ cur fios gu còrr is 3000 neach air a bheil ciorram gus an obair seo a stiùireadh.

Bha sinn air leth toilichte gun deach na h-oidhirpean seo aithneachadh sa Ghiblean 2025, nuair a bhuannaich Comhairle Ealain Shasainn agus All In Duais Disability Smart airson Solarachadh.

Atharrachaidhean adhartach taobh a-muigh All In

Bha buaidh nas fharsainge aig an dòigh-obrach ion-ghabhalach seo taobh a-muigh All In. Tha na solaraichean againn a’ dèanamh leasachaidhean air na cleachdaidhean ion-ghabhalach aca fhèin le bhith ag iarraidh orra gealltainn a bhith a’ lìbhrigeadh ‘Luach Sòisealta’. Mar eisimpleir, sa chumhnant aca, gheall an solaraiche didseatach againn cothroman eòlais is conaltraidh a thoirt do chom-pàirtichean bodhar, ciorramach, agus neuro eag-samhalach, agus a bhith na Fhastadair a tha Misneachail a thaobh Ciorraim.

Àm ri teachd le ion-ghabhaltachd

Aig an àm seo, tha All In ag amas air cnapan-starra ann an cruthachalachd agus cultar a thoirt air falbh, ach tha e cudromach daoine air a bheil ciorraman a riochdachadh anns a h-uile raon. Le bhith a’ suidheachadh bun-inbhe àrd-amasach san roinn againn, tha sinn an dòchas gun coimhead roinnean eile oirnn mar eisimpleir air na ghabhas dèanamh nuair a thèid ion-ghabhail agus eòlas beatha a stèidheachadh ann am pròiseact bho thùs.