Pawb Mewn Grŵp Ymgynghorol

Rydw i wedi bod yn gweithio yn y celfyddydau ers dros 25 mlynedd, fel Artist sy’n Ymgysylltu’n Gymdeithasol, Perfformiwr, Hwylusydd, Cydlynydd, a Swyddog Datblygu’r Celfyddydau. Rydw i bellach yn hyfforddi i fod yn Gwnselydd Integredig ac yn Hyfforddwr Somatig ar gyfer pobl sydd â Phrofiad Bywyd ac Unigolion Creadigol. Am flynyddoedd lawer, fe wnes i guddio fy mhoen cronig, gorflinder cronig a fy niwroamrywiaeth oherwydd fy mod i’n ofni colli gwaith. Dim ond yn ystod yr ychydig flynyddoedd diwethaf rydw i wedi dechrau dod allan i eirioli drosof fy hun.

Rwy’n gweithio gyda chwmni theatr The Misfits ac amryw o gwmnïau eraill sy’n datblygu ac yn hwyluso prosiectau Celfyddydau a Lles. Yn y gorffennol, rwyf wedi gweithio gyda sefydliadau sy’n cynnwys Inclusion Gloucestershire, Spike Island, Amgueddfa Gustav Holst, Wiltshire Youth Arts Partnership, fel Cyfarwyddwr Artistig Above and Beyond a chwmni theatr Attic Fusion.

Rwy’n frwd dros hygyrchedd a chynhwysiant yn y celfyddydau, gyda phobl fel arbenigwyr drwy brofiad yn cyd-gynhyrchu ac ar flaen y gad o ran gwneud penderfyniadau, datblygu a chyflawni. Rydw i wedi gweithio mewn amrywiol leoliadau celfyddydol, ac rwyf wedi profi ychydig iawn o ymwybyddiaeth o ran hygyrchedd a chyfathrebu dwyochrog wrth ymgynghori â phobl sydd â phrofiad bywyd. Rwy’n teimlo y gall hyn fod yn rhwystr enfawr, nid yn unig i bobl sydd â phrofiad bywyd o fynychu digwyddiadau byw, ond hefyd i’r rheini sy’n teimlo bod y celfyddydau fel gyrfa yn heriol neu’n anodd iawn cael mynediad ato os oes gennych brofiad bywyd. Rwy’n gobeithio y bydd Cynllun All In yn agor deialog, yn datblygu cyfleoedd ac yn creu newid cynaliadwy.

Rwy’n awdur ac yn ymgynghorydd mynediad, sydd wedi’i restru fel un o’r 150 o Ddylanwadwyr Cyhoeddi Gorau gan Bookseller yn 2023. Enillais yr Aurora Prize for Writing yn 2021, a chyhoeddwyd fy ngherdd, IMAGINE, yn Not Going Back To Normal – A Disabled Artists Manifesto. Cyrhaeddodd fy nofel gyfoes i oedolion ifanc y rhestr fer ar gyfer SCBWI Undiscovered Voices 2022 Anthology, Guppy Open Submissions Competition 2022, Write Mentor Children’s Novel Award 2021 ac Owned Voices Novel Award 2021. Rydw i wrthi’n amlinellu cofiant natur a sgriptiau ar gyfer ffilm fer.

Fi yw Cyd-sylfaenydd a Chyfarwyddwr yr Inklusion Guide: A kickass guide to making literature events accessible to disabled people. Lansiwyd y canllaw rhad ac am ddim yng Ngŵyl Lyfrau Ryngwladol Caeredin yn 2022 ac fe’i cynhyrchwyd mewn partneriaeth â Penguin Random House. Mae bellach yn cael ei ddefnyddio gan sefydliadau llenyddol a gwyliau ledled y byd, yn ogystal ag unigolion sy’n dymuno hunan-eirioli er mwyn diwallu eu hanghenion.

Rwy’n un o ymddiriedolwyr Mslexia Magazine, ac rwy’n aelod o bwyllgor Rhwydwaith Anabledd y DU ym maes cyhoeddi, lle rwy’n gobeithio helpu i sicrhau newid ystyrlon tuag at ddiwydiant mwy cyfartal.

Rydw i’n chwarae’r gitâr, yr iwcalili a’r piano, ac rydw i’n darlunio ac yn paentio, yn ogystal ag ysgrifennu. Rydw i wrth fy modd yn bwyta bwyd da, yn teithio i lefydd newydd, ac yn mynd am deithiau cerdded hir yng nghefn gwlad.

Rydw i wedi bod yn gweithio yn y sector hawliau anabledd, yn bennaf yng Nghymru, ers bron i ddeng mlynedd ar hugain. Yn ystod y cyfnod hwnnw, mae wedi bod yn bleser cael cwrdd â rhai o’r artistiaid anabl talentog niferus yng Nghymru, gan gynnwys Jon Luxton, Natasha Hirst, Sara Beer a Maggie Hampton. Rydw i hefyd yn rhiant i dri o blant anabl sy’n oedolion.

Drwy gydol fy ngyrfa, mae fy ngwaith wedi cynnwys rheoli prosiect tai hygyrch yng Nghaerdydd, a gweithio am ddeng mlynedd fel Rheolwr Polisi Mynediad yn Anabledd Cymru. Roedd hyn yn cynnwys gweithio gyda Bwrdd Croeso Cymru i ddatblygu cynllun achredu hygyrchedd ar gyfer gwestai yng Nghymru (ychydig yn debyg mewn rhai ffyrdd i’n prosiect).

Rwyf hefyd yn archwilydd mynediad cymwys a phrofiadol ac rwy’n frwd iawn dros ddylunio cynhwysol. Rwyf wedi archwilio adeilad Southbank y BFI, ac wedi gweithio gyda nhw ar brosiectau eraill, gan gynnwys helpu i olygu casgliad archif Disabled Britain ac ysgrifennu blog am weledigaethau hen a newydd o anabledd ar y sgrin.

Ar hyn o bryd rwy’n gweithio’n rhan-amser i’r elusen Scope i wreiddio cyd-gynhyrchu fel model gweithredu allweddol ar draws y sefydliad, ac rwyf hefyd yn Gymrawd yr RSA (y gymdeithas frenhinol ar gyfer y celfyddydau, gweithgynhyrchu a masnach).

Rwy’n frwd dros frwydro dros gydraddoldeb anabledd.

Fy niddordebau yw ffilm, theatr, cerddoriaeth, pensaernïaeth a drymio.

Rwy’n berson creadigol o Dde Cymru sy’n byw yn Lerpwl ar hyn o bryd. Mae gennyf BA mewn Drama ac Ysgrifennu Creadigol o Royal Holloway, Prifysgol Llundain; yn ogystal ag MA mewn Diwydiannau Diwylliannol a Chreadigol o Brifysgol Caerdydd.

Rwy’n gyn-Gyfarwyddwr Artistig y cwmni theatr, Rolling Pig Productions. Mae fy nghefndir yn cynnwys gwaith theatr a gwaith ysgrifenedig, gan weithio gyda sefydliadau fel yr Eisteddfod Genedlaethol, Shift Caerdydd, Gŵyl Llenyddiaeth a Chelfyddydau y Gelli, a Gŵyl Stowaway.

Yn ogystal, fi yw cydawdur Tami: Y Pump, sef nofel Gymraeg sy’n ceisio amrywio’r gynrychiolaeth mewn llenyddiaeth Gymraeg.

Ar hyn o bryd rwy’n gweithio ar ddatblygu fy ymarfer creadigol fel bardd.

Rwy’n fardd arobryn, dramodydd, ac yn Gyfarwyddwr Artistig CRIPtic Arts, sefydliad celfyddydau arloesol sy’n cael ei arwain gan bobl anabl yn y DU. Yn CRIPtic, rwy’n ymchwilio, yn canfod ac yn eirioli dros ddatrysiadau posibl i rwystrau mynediad ar gyfer artistiaid a chynulleidfaoedd anabl; yn cynnal deoryddion datblygu sefydliadol; yn curadu a chyflwyno rhaglenni hyfforddi ar gyfer pobl greadigol anabl ar bob cam gyrfa; ac yn cyfarwyddo cynyrchiadau sy’n herio ac yn ehangu ffiniau artistig.

Rwy’n cael fy adnabod fel un o’r cant o bobl anabl mwyaf dylanwadol yn y DU, ac rwy’n gweithio mewn amrywiaeth eang o feysydd. Mae fy ngwaith ymchwil academaidd a phroffesiynol yn canolbwyntio ar bobl anabl, arweinyddiaeth, mynediad a datblygiad sefydliadol, yn enwedig yn y sectorau celfyddydau, addysg a dielw. Rwy’n cymhwyso’r arbenigedd hwn i’r gwaith ymgynghori, hyfforddi a mentora sy’n canolbwyntio ar fynediad rwy’n ei ddarparu i sefydliadau, digwyddiadau ac unigolion. Mae’r dull hwn wedi’i wreiddio ym maes gwrth-ableddiaeth a chyfiawnder anabledd, ac mae’n archwilio datrysiadau i rwystrau mynediad parhaus mewn ffordd bragmatig, gan weithio mewn amgylcheddau sy’n gyfyngedig o ran adnoddau.

Mae fy ymarfer artistig craidd yn cwmpasu barddoniaeth, sgriptio a theatr, gan ymgysylltu â themâu cyfiawnder anabledd, marwoldeb a natur. Mae hyn yn cynnwys y sioe unigol arobryn, NOT DYING (Theatremaker of the Year, Future Theatre Fund 2021), sydd wedi cael ei harddangos yn genedlaethol ac yn rhyngwladol. Ar hyn o bryd rwy’n datblygu sioe ar gyfer y dyfodol o’r enw “Quality of Life is Not a Measurable Outcome”, ac yn curadu sioe newydd, The Crip Monologues. Cyhoeddwyd fy mhamffled barddoniaeth, Shield, gan Verve Poetry Press yn 2021, ac roeddwn yn un o gymrodyr barddoniaeth nodedig Jerwood 2021-2022, ac ar ôl hynny sefydlais y Disabled Poets’ Prize yn 2022. Rwyf hefyd yn cyfarwyddo Romeo a Juliet, gydag actorion anabl, fel rhan o brosiect ymchwil Cripping Breath, a ariennir gan Wellcome.
Yn ogystal â’m harfer artistig, rwy’n gweithio ym maes arweinyddiaeth anabledd, ymchwil polisi ac ymgynghori, gan gynnwys fel Prif Swyddog Gweithredol Pathfinders Neuromuscular Alliance a Chadeirydd Lewisham Disabled People’s Commission.

Fi yw’r Partner Amrywiaeth Creadigol yn ITV, felly rwy’n rhan o’r tîm sy’n cyflwyno’r Cynllun Sbarduno Amrywiaeth. Rydw i’n ymwneud â chyflawni agenda anabledd ITV ac rydw i hefyd yn gweithio’n agos gyda chynhyrchwyr a’r timau comisiynu i sicrhau bod tîm amrywiol a chynhwysol yn ymwneud â chomisiynau ITV, gan weithio’n agos iawn gyda’r timau ym maes Adloniant Ffeithiol, Chwaraeon, Teledu yn Ystod y Dydd ac operâu sebon.

Cyn ymuno ag ITV, roeddwn yn gweithio i gwmni hyfforddi ac ymgynghori thinkBIGGER!, lle roeddwn yn gweithio ar brosiectau fel Cynllun Hyfforddiant Cynhyrchu Channel 4 ac ar y rhaglen hyfforddi ar gyfer cyflwynwyr a gohebwyr anabl mewn paratoad ar gyfer Gemau Paralympaidd Llundain 2012.

Rwyf hefyd yn cadeirio Grŵp Cynghori ar Anabledd BAFTA, yn aelod o’u Pwyllgor Dysgu, Cynhwysiant a Thalent, ac yn rhan o Grŵp Llywio Amrywiaeth BAFTA ar gyfer y Gwobrau. Rwyf hefyd yn rhan o Grŵp Cynghori ar Anabledd Sefydliad Ffilm Prydain ac yn Gadeirydd Bwrdd Ymddiriedolwyr Cwmni Theatr Graeae. Yn 2021, cefais fy nghynnwys ar restr Power 100 Ymddiriedolaeth Shaw, sef y rhestr o’r 100 o bobl anabl mwyaf dylanwadol yn y DU. Dyfarnwyd MBE i mi am wasanaethau i bobl anabl yn rhestr Anrhydeddau Pen-blwydd Jiwbilî’r Frenhines ym mis Mehefin 2022.

Mae rhan helaeth fy swydd yn canolbwyntio ar gynrychiolaeth a sicrhau bod pobl o grwpiau sy’n cael eu tangynrychioli yn cael cyfleoedd i ennill, datblygu a ffynnu yn eu gyrfaoedd yn y diwydiant teledu. Rydw i’n frwd dros chwalu rhwystrau a sicrhau tegwch i bawb, yn enwedig pobl anabl, a sicrhau bod lleisiau’r rheini nad ydyn ni’n clywed ganddyn nhw’n aml yn cael eu dyrchafu. Mae mynediad a hygyrchedd yn y Diwydiannau Creadigol yn faes pwnc allweddol ar hyn o bryd, ac rwy’n edrych ymlaen at ymgorffori hygyrchedd yn y system ym mhopeth a wnawn, ac rwy’n gobeithio y bydd y Cerdyn Mynediad hwn yn rhan o’r datrysiad i lawer o bobl.

Rydw i’n mynd i’r theatr yn aml ac wrth fy modd yn gwylio perfformiadau byw. Rydw i hefyd yn gwylio LOT o deledu. Yn ffodus i mi, gallaf gyfrif hyn fel gwaith, ond rwy’n gwylio llawer ohono, boed hynny’n ddrama, rhaglenni dogfen, digwyddiadau byw, rhaglenni adloniant mawr neu gyfresi realaeth – rwy’n eu caru i gyd!

Mae fy mhrofiadau bywyd yn aml yn llywio fy ngwaith. Er enghraifft, ym mis Rhagfyr 2008, bu bron i mi farw o haint prin ar yr ymennydd, a wnaeth fy ngadael gydag anaf i’r ymennydd. Fe wnes i greu cynhyrchiad theatr ymdrochol yn seiliedig ar sain am fy mhrofiadau o’r enw Reassembled, Slightly Askew sydd wedi teithio’n lleol, yn genedlaethol ac yn rhyngwladol mewn gwyliau celfyddydol a lleoliadau hyfforddiant meddygol ers 2015.

Rwy’n frwd dros gydraddoldeb a hawliau dynol.

Symudais i Ogledd Iwerddon o’r Unol Daleithiau yn 2004, ac yn 2005 gwnaeth fy mhartner a minnau hanes fel y bartneriaeth sifil gyhoeddus gyntaf yn y DU, cyn mynd ati i herio llywodraeth Gogledd Iwerddon yn y llys yn 2015 er mwyn dod â phriodas o’r un rhyw i Ogledd Iwerddon. Mae fy mhrofiadau fel mewnfudwr, unigolyn o leiafrif ethnig hil-gymysg (Tsieineaidd/Cawcasaidd), mam-artist cwiar ag anabledd sy’n byw yng Ngogledd Iwerddon wedi’u gwreiddio’n ddwfn yn fy ngwaith.

Rwy’n artist ac yn wneuthurwr perfformiadau sy’n arbenigo mewn mynediad creadigol a llesiant yn y theatr a’r sector diwylliannol ehangach. Gyda chefndir mewn theatr, mae fy ngwaith bob amser yn defnyddio dull rhyngddisgyblaethol. Rwyf wedi cydweithio ag amrywiaeth o sefydliadau ac artistiaid, gan archwilio cyfiawnder anabledd a chreu newid ar lefel ranbarthol a rhyngwladol. Gan ganolbwyntio ar ddatblygu artistiaid a gyrfaoedd portffolio, cefais gyllid datblygu i archwilio arferion artistig cynaliadwy fel artist anabl.

Yn wreiddiol o Wigan (ond bellach yn rhannu fy amser rhwng Gogledd Orllewin Lloegr a Chanolbarth Lloegr) gyda chefndir ym maes cerddoriaeth glasurol, mae fy ngwaith yn cwmpasu dau faes allweddol: ymarfer creadigol a hyrwyddo newid. Mae gennyf ddiddordeb mewn cynnal gwaith ymchwil sy’n ymwneud ag ymarfer artistig, diwydiannau creadigol a theori feirniadol, ac rwy’n rhannu’r angerdd hwn drwy ddarlithio mewn ysgol ddrama yn Birmingham, ac rwy’n ymgymryd â gradd meistr mewn ymarfer ymchwil artistig yng ngholeg Central Saint Martins, Llundain.

Yn greadigol, rwy’n cael mwynhad wrth archwilio gwahanol safbwyntiau theatrig ac ymchwilio i’r bwriad sylfaenol mewn perfformiad. Yn bedagogaidd, rwyf ar hyn o bryd yn ymchwilio i gymwysiadau perfformiad o fewn yr amgylchedd dysgu ei hun, yn ogystal â’r ffyrdd y mae unigolion creadigol yn ymgysylltu â’r broses ddysgu.

Rwy’n artist amlddisgyblaethol, yn gerddor, yn ddarlithydd prifysgol ac yn fentor i artistiaid sy’n rhannu fy amser rhwng Llundain a Kent, y DU. Mae fy ymarfer yn archwilio ffuglen ddamcaniaethol, ecolegau ac ymberthyn drwy gelf llais a sain, cerddoriaeth electronig (cyfansoddi a byrfyfyrio), delweddau symudol, ysgrifennu a pherfformio. Rwyf hefyd yn cyd-greu mewn realiti cymysg, gosodiadau celf, podlediadau a gweithdai.

Rwy’n fentor artistiaid arbenigol gyda dros ddegawd o brofiad yn cefnogi datblygiad creadigol a phroffesiynol artistiaid.

Yn ddiweddar, rydw i wedi mentora artistiaid fel rhan o grant Developing Your Creative Practice (DYCP) Cyngor Celfyddydau Lloegr, prosiect Amplify Canolfan Gelfyddydau Wysing, Cydweithfa Celfyddydau Ieuenctid LGBTQ Outside a rhaglen Datblygu Artistiaid Drake Music.

Rwy’n falch o’m gwaith fel Artist Preswyl gyda Drake Music (2022) a Chanolfan Gelfyddydau Wysing (2022), o dderbyn Bwrsari Celfyddydau Jerwood yn 2021, a chyrraedd rownd derfynol Gwobr Gelf Womxn of Colour a Gwobr Adam Reynolds yn 2021.

Rwy’n frwd dros gynhwysiant a hygyrchedd: mae ehangu mynediad at y celfyddydau a diwylliant yn werthoedd craidd sydd wrth wraidd fy ngwaith fel artist, addysgwr, mentor artistiaid ac ymgynghorydd mynediad.

Mae fy niddordebau personol yn cynnwys teithiau cerdded ar hyd llwybrau’r arfordir a beicio; sglefr-rolio a sglefrfyrddio; ioga a symudiadau greddfol; gerddi gwyllt, botaneg a llysieuaeth.

Rwy’n Arweinydd Tîm Gwerthu Tocynnau yng Nghanolfan y Barbican, Llundain, ac rwyf hefyd yn awdur, yn weithiwr creadigol ac yn ymgynghorydd llawrydd. Rwyf wedi gweithio gyda’r Ruckus Collective i gynllunio encilion hygyrch a digwyddiadau ar-lein ar gyfer unigolion creadigol sydd ar y cyrion, a chyflwyno gweithdai yn eu digwyddiadau. Mae North Wall (Rhydychen), Spread the Word (Llundain), a thŷ cyhoeddi Canongate wedi cefnogi fy ngwaith ysgrifennu. Ar hyn o bryd rwy’n gweithio ar fy llyfr cyntaf, casgliad o draethodau, ac ar gael fy nrama lwyfan gyntaf yn barod i’w llwyfannu.

Rydw i’n frwd dros amrywiaeth a chynhwysiant – yn amlwg! – ac yn enwedig ynghylch annog pobl sydd ar y cyrion i weld eu hunain, a chael eu gweld, gan gymdeithas, fel pobl creadigol yn eu rhinwedd eu hunain. Yn rhy aml, rydym yn ôl-ystyriaeth, neu’n cael ein hystyried yn ddim mwy nag aelodau o’r gynulleidfa sydd angen bod yn ganolbwynt i ymgyrchoedd “allgymorth” a “chynhwysiant”, pan mae llawer ohonom yn awyddus iawn i gael ein cynnwys!

Yn fy swydd o ddydd i ddydd, ac fel ymgynghorydd, siaradwr ac arweinydd gweithdai llawrydd, rydw i bob amser yn ymdrechu i wneud y celfyddydau yn lle mwy cynhwysol a hygyrch i bob un ohonom, gan ddefnyddio fy mhrofiadau fel person anabl, cwiar a niwrowahanol.

Mae gen i ddiddordeb mewn celf yn ei holl ffurfiau gwahanol, ac mae gen i gefndir fel beirniad theatr, cerddoriaeth a llenyddiaeth. Rydw i hefyd wrth fy modd gyda gemau fideo, natur, crefft, a RuPaul’s Drag Race.

Rwy’n falch o sut rydw i wedi gwneud gwahaniaeth i hygyrchedd mewn lleoliadau diwylliannol drwy fy ngwaith, gan gynnwys cyflwyno sawl seminar dramor, a oedd yn dipyn o fraint. Yn fwy diweddar, roeddwn i’n falch o arwain tîm wrth drefnu a chydlynu pedwar diwrnod o ddigwyddiadau’r Jiwbilî Platinwm yn ein cymuned.

Rwy’n frwd dros fynediad a chydraddoldeb. Ond nid yw hynny’n syndod, o ystyried fy mod yn defnyddio cadair olwyn!
Rydw i wrth fy modd yn bod yn greadigol ac yn rhan o unrhyw beth sy’n ymwneud â’r celfyddydau.

Mae gennyf ddyheadau amrywiol, gan gynnwys parhau i sicrhau mwy o fynediad a chydraddoldeb i bobl anabl. Rwy’n gobeithio gweithio yn y diwydiant teledu a ffilm, a hyd yn oed cael fy sioe sgwrsio fy hun ar y teledu. Yn olaf ar fy rhestr fwced, mae ennill BAFTA am ysgrifennu neu actio.

Mae gen i ddiddordeb arbennig mewn teledu a gwneud ffilmiau, o ddrama i gomedi, cyflwyno a rhaglenni dogfen. Rydw i hefyd wrth fy modd gyda’r theatr. Rydw i’n chwarae’r organ geg ac roeddwn i’n arfer bod mewn band. Rydw i wrth fy modd yn teithio ac yn mynd i lefydd newydd. Rydw i’n dilyn chwaraeon, gan gynnwys pêl-droed, rygbi, athletau a snwcer.

Fi yw Cynhyrchydd Cynorthwyol Mind the Gap (y cwmni perfformio a chelfyddydau byw anabledd dysgu). Rydw i hefyd yn cyflwyno ac yn cyd-gynhyrchu ‘The Disability And… Podcast’, sy’n gydweithrediad â Disability Arts Online.

Dros y ddwy flynedd ddiwethaf, rydw i wedi bod yn Asiant Newid Ramps on the Moon yn Leeds Playhouse. Rwyf hefyd wedi datblygu a chynnal cwrs Cyflwyniad i Gynhyrchu ar gyfer pobl greadigol anabl yn ddiweddar.

Dechreuais weithio yn y theatr ar ôl ennill Diploma Cyntaf mewn Celfyddydau Perfformio yn 17 oed, ac ar ôl hynny fe ymunais â Chwmni Theatr Double Act Disability yn Bournemouth. Yn 2011, cefais fy nghyllido gan Ammonite i ddysgu am gynhyrchu, a threuliais wythnos yn Mind the Gap. Yn 2012, fi oedd Cynhyrchydd Cynorthwyol sioe o’r enw Breathe, ar gyfer seremoni agoriadol y digwyddiad hwylio yn y gemau Olympaidd.

Yn 2014, symudais i Bradford o Dorset i ymuno â Mind the Gap. Es drwy gwrs hyfforddi’r cwmni a dod yn Artist gyda’r cwmni. Yn 2018, fi oedd cyd-gynhyrchydd gŵyl gelfyddydau anabledd dysgu BEYOND yn Leeds. Rhwng 2018 a 2019, fi oedd y Cynhyrchydd Cynorthwyol (interniaeth) ar gyfer ZARA, cynhyrchiad Mind the Gap, Walk the Plank ac Emergency Exit Arts, am anableddau dysgu a bod yn rhiant.

Yr hyn yr wyf yn teimlo’n angerddol yn ei gylch yw peidio â gorfod siarad ar baneli am fynediad yn ystod y 30 mlynedd nesaf. Pan fydda i’n siarad, rydw i eisiau dod â phethau newydd i’r sgwrs a dydw i ddim eisiau i bobl feddwl, ‘O, rydw i’n gwybod beth mae Paul yn mynd i siarad amdano’. Mae angen lleisiau newydd bob amser yn y sgyrsiau sy’n cael eu clywed, ond ni allwn anghofio gwaddol pobl anabl eraill sydd wedi helpu i baratoi’r ffordd.

Mae fy niddordebau personol yn cynnwys y theatr, pêl-droed, canu ac ymgodymu, ddim o reidrwydd yn y drefn honno. Rydw i’n dwlu ar theatr gerddorol, ac rydw i wrth fy modd â Hamilton, Wicked a Les Misérables. Rydw i’n hoffi sioeau sy’n cael eu llwyfannu mewn lleoliadau anarferol, a chynyrchiadau sy’n ymgorffori mynediad fel rhan o’r sioe. O ran ymgodymu – All Elite Wrestling yw fy ffefryn, ond rwy’n dal i wylio WWE a sioeau ymaflyd codwm annibynnol, ac yn ceisio mynd i rai digwyddiadau. Rydw i’n chwarae pêl-droed Ability Counts ac yn teithio i Dorset i chwarae dros y dref lle cefais fy magu. Rwy’n cefnogi Tottenham, Bournemouth a Wimborne, ac rwy’n gwylio gemau Bradford City.